Efnahagsmál

Efnahagsmál: Þeir sem ekki lásu Morgunblaðið á mánudaginn eða síðu Egils Helgasonar í dag ættu að lesa greinina eftir Jón Steinsson sem þar birtist undir heitinu ,,Ráðleggingar til vinstri stjórnar" - ég hef takmarkaða trú á að þetta verði að raunveruleika, eins vel og þetta hljómar.

Knattspyrna: Að United skuli ekki hafa unnið stærra en 1-0 í gær er skandall. 4-0 hefði gefið raunverulegri mynd á þennan leik - er hræddur um að liðinu verði refsað í seinni leiknum fyrir klúðrið í þeim fyrri.

Er lífið ekki dásamlegt?

Skúrkar alþjóðahagkerfisins

Á meðan allt brennur og Ísland er í rjúkandi rúst er rétt að benda á þennan þátt um skúrka alþjóðahagkerfisins. Spurningin er hins vegar hvort það eru hinir siðblindu eða þeir sem ekki settu lög um leikreglur sem eru mestu skúrkarnir - sennilega eru einhverjir í báðum hópunum.
Við Seðlabankann er aðeins eitt að segja:

,,If you lose dollars for the firm by bad decisions, I will be understanding…
… if you lose reputation for the firm, I will be RUTHLESS“

Warren Buffett

Er lífið ekki dásamlegt?

Nokkrir stuttir

Pólitík: Það var ekki merkilegar ræður sem haldnar voru á Alþingi í gær... usss! Svona röðuðust frummælendur:

Steingrímur var bestur að venju og mér sýndist hann hreinlega á tímabili vera orðinn forsætisráðherra eftir arfa slaka frammistöðu Geir H. Haarde.

Jóhanna var næst best og benti á lausnir á vandamálum og hvað þegar hefur verið gert m.a. annars í hennar málaflokki. Samt sem áður var hún sennilega næst best vegna þess að aðrir voru svo slakir.

Geir H. Haarde var hrikalega líflaus og boðaði áframhaldandi stefnuleysi og má einungis þakka Guðna Ágústsyni og Guðjóni Arnari fyrir hræðilegri ræður.

Guðni Ágústsson lagði ekkert fram og gat varla nefnt nokkuð gott sem hans flokkur lagði fram á 12 árum á meðan hver einasti maður getur bent á 10 atriði fyrir því hvers vegna Framsókn ber stóra ábyrgð á núverandi ástandi. Ef að Lenin tæki völd á Íslandi (sem verður blessunarlega ekki) að þá væri Guðni í hópi fyrstu 10 einstaklinganna sem væri stillt upp við vegg og skotnir.

Guðjón Arnar sagði kannski eitthvað en allir voru löngu búnir að missa einbeitinguna, hvernig er hægt að vera alþingismaður og koma ekki frá sér orðum án þess að hökta 50 sinnum í hverri setningu.

Af öðrum held ég að flestir geti verið sammála um að Össur og Katrín Jakobs báru af, enda ættu flestir aðrir að snúa sér að einhverju öðru en að tala fyrir hönd þjóðarinnar, Ásta Möller WTF???

Efnahagsmál: Hvað er hægt að segja? Best bara að sleppa því. Geir H. Haarde heldur ræðu og það kemur blindbylur og frost yfir Reykjavík - er það ekki eins nálægt raunveruleikanum og hægt verður komist þegar allt er í klessu.

Stjórnmál BNA: Ég horfði á Biden vs Palin í nótt, mögulega voru þær rökræður skemmtilegri en Obama vs McCain. Palin stóð sig betur en menn þorðu a vona en það gerði Biden einnig. Á CNN töldu áhorfendur að Biden hefði verið betri og var munurinn um 15%. Þannig að sennilega hefur Biden haft meiri áhrif á óháða/óákveðna en Palin - nú er staðan þannig að McCain er hreinlega að falla á tíma og þarf einhver alvöru útspil ef ekki á að fjara undan þessu hjá honum endanlega enda um mánuður í kosningar og flest allt á móti honum í augnablikinu.

Hið jákvæða: Þó að menn séu farnir að búa til snörur úr Boss bindunum sínum í bankanum að þá verður alltaf einhver að halda í jákvæðnina. Andfótbolti er á sínum stað og ég lofa á næstu dögum færslu hér sem mun gleðja menn.

Er lífið ekki dásamlegt?

Efnahagsmál

Hér er hressandi viðtal við Jónas H. Haralz. Gaman að sjá gamalmenni segja eitthvað að viti (ólíkt þessum arfavitlausa og hundleiðinlega minningarþætti um Sigurbjörn Einarsson sem ég minntist hér á að neðan). Stundum fannst mér eins og Jónas væri að lesa upp úr bók slíkt var skipulagið. Það kom nánast aldrei hik á hann, hann rakti rök sín skipulega og spurði svo sjálfur spurninga og svaraði þeim - allt mjög svo niðurnjörfað og fallega gamaldags, ein af fáum hefðum sem við ættum að temja okkur í ríkari mæli.

Er lífið ekki dásamlegt?

Kvikmyndir - knattspyrna - tónlist... og allt hitt

Efnahagsmál: Allir sennilega komnir með nóg af þessum handónýta gjaldmiðli sem við höfum. Ég er að gæla við þá hugmynd ef að einhverjir eru til í það með mér (líklegir kandítatar Baldur Knúts, Andri Fannar, Viðar, Daði og örugglega einhverjir fleiri) að safna skeggi þar til Evran fer niður fyrir 100 kr eða að við Íslendingar tökum upp aðra mynt. Ætlaði að hafa það 90 kr en það er víst út úr myndinni. Hvað segja menn við þessu? Hver er tilbúinn? Hagnaðurinn kannski?...
Vorið loksins að koma - kjötfars og ýsu á grillið?

Stjórnmál: Einhver búinn að gleyma bandarísku kosningunum? Hillary á erfiða ferð fyrir höndum.

Knattspyrna: United komið á toppinn með þriggja stiga forystu eftir auðveldan sigur á Bolton í gær og átta umferðir eftir - það þarf ekki að koma á óvart að það var Ronaldo sem skoraði bæði mörkin, annað þeirra úr þessari aukaspyrnu - hvað er að þessum manni? Spennan magnast því um helgina mætir United grönnum sínum frá Liverpool sem eru í feiknarformi á meðan Arsenal fer í heimsókn á Stamford Bridge og mætir Chelsea. Andfotbolti.net er með þetta allt á hreinu og miklu meira en það.

Tónlist: Bob Dylan á leiðinni til landsins og Megas með plötu ársins, er nokkuð meira viðeigandi þegar að allt virðist vera í frjálsu falli? Það þarf aðeins eina pillu og öll þín þraut er á braut...
...það eru annars einhverjar líkur á nýrri plötu frá Meistaranum, það ætti að kæta konur og menn.

Trú: Á TED ráðstefnunni fara fram fyrirlestrar margra mestu hugsuða nútímans. Einn af þeim er Michael Shermer sem veltir fyrir sér mörgu af því ótrúlega bulli sem fólk trúir - góð skemmtun.

Kvikmyndir: Páskarnir í nánd og það þýðir margt slæmt í mínum huga - eitt af því er vont sjónvarpsefni. Hver nennir að horfa á Jón Odd og Jón Bjarna, Nonna og Manna, óperur og 30 ára gömul sirkusatriði í bland við einhvern Biblíu ófögnuð? Fyrstu tvær Back to the future myndirnar eru málið!

Er lífið ekki dásamlegt?